පරිගණකයක් භාවිතා කරද්දි මේ උපදෙස් පිළිපදින්න

කාලය ඉක්මනට ගෙවිලා යනවා. ගෙවිලා යන කාලයත් සමඟ තාක්ෂණයත් දිනෙන් දිනම දියුණුවෙනවා. විශේෂයෙන්ම පරිගණකය අද නැතුවම බැරි උපකරණයක් වෙලා. සමාජ ජාල වෙබ් අඩවි ඉන් ප‍්‍රධානයි. දවසින් දවස මෙම සමාජ ජාල වෙබ් අඩවි වල සැරිසරන පිරිස වැඩිවෙනවා. ඒත් එහි ඇති තාක්ෂණික භාවිතය හා එහි සීමා එම පිරිස නොදන්නවා විය හැකියි. ඒ නිසාමයි අද සමාජජාල වෙබ් අඩවි භාවිත කරන්නන් අතරින් ඛේදවාචක වැඩිපුරම අසන්නට ලැබෙන්නේ.

මා අදත් ඔබට කියන්නේ එවැනිම කතාවක්. ඒ තාක්ෂණික මෙවලම් භාවිතයේදී ඔබත් ඒ පිළිබඳ දැනුවත් විය යුතු නිසා.

ඇය ඉමල්කා. ප‍්‍රසන්න පෙනුමැති යුවතියක්. පවුලේ තිබූ ආර්ථිකමය ගැටලූ හේතුකරගෙන උසස් පෙළින් පසු පාසල් අධ්‍යාපනයට සමුදුන්නා. ඒ අතරෙයි ඉමල්කට මංගල යෝජනාවක් ආවේ. ඔහු ගාමින්ද. නගරයේ හෝටලයක කෝකියෙක් විදියට සේවය කළා. ඔහු ඉමල්කලාගේ දුර නෑයෙකුත් වුණා. ඒ නිසාම ඉමල්කා ගාමින්දටත් ගාමින්ද ඉමල්කටත් කැමැත්ත ප‍්‍රකාශ කරගත්තා.

එසේ ඇරඹුණු ආදරය සුන්දරව ගලා ගෙන ගියා. බක්මහේ ආව නැකැත් දවසක ගාමින්ද ඔහුගේ මනමාලිය කැන්දාගෙන ගියා. ඒ ආදරය ගොඩක් සුන්දර වුණා. ගාමින්දත් ඉමල්කත් මාපියන් වෙන්න පෙරුම් පිරුවේ ඒ ආකාරයට. ඔවුන්ගේ ප‍්‍රාර්ථනා ඉෂ්ට කරමින් ඉමල්කා පුතෙකු ලැබුවා. ගාමින්දටත් රටක් රාජ්‍යයක් ලැබුණා වගේ සතුටක් දැණුනා.

ගාමින්දගේ පුංචි කුරුලූ කූඩුවේ ආදරය ඉතිරිලා පැතිරිලා ගියා. ඒ ආකාරයට වසර දෙකතුනක් ගලා ගිය අතර නැවතත් ඉමල්කා

ගැබ්බර වුණා. ගාමින්ද පුංචි පුතුගේ තනියට එන ලේ කැටි බිළිඳා එනතුරු මඟබලා සිටියා. ඇය පුංචි දුවණියක්.

දුවයි, පුතයි එක්ක ජීවිතය ගෙන ගිය මේ පුංචි පවුල සැබෑවටම සතුටින් ජීවත්වුණා. ඉමල්කා ගාමින්දටත්, ගාමින්ද ඉමල්කාටත් තව තවත් ආදරය වුණා.

ඒ අතර තුරයි ගාමින්දට පිටරට රැුකියාවකට යන්න අවස්ථාව උදාවූයේ. එය ඔහු දුටු සිහිනයක්. ඒත් එය සැබෑවෙලා ගාමින්ද ඒ සතුටත් එක්කම

ගොඩක් දුක්වුණා. ඒ ඔහුගේ ප‍්‍රිය බිරිඳවූ ඉමල්කාවත් දෑසවන් දරුදෙදෙනාවත් තනිකරදමා යාමට සිදුවීම පිළිබඳව.

ගාමින්දගේ සිහිනය ගැන ඉමල්කා දැනගෙන හිටියා. ඔහුගෙන් දුරස්වීම වේදනාවක් වුවත් ඔහුට රටයාමට අවශ්‍ය චිත්ත ධෛර්ය සැපයීමට ඉමල්කා කටයුතු කළා.

සිය දරු දෙදෙනාත් බිරිඳත් නිරන්තරයෙන්ම දැකීම ප‍්‍රිය කටයුත්තක් ලෙස සැලකූ ගාමින්ද වෙන රටක සිටියත් ඔවුන් දැකගත හැක්කේ කෙසේදැයි කල්පනා කළා. ඒ නිසයි  ඔහු රටයාමට පෙර පරිගණකයක් නිවසට ගෙන එන්නේ.

එහිදී ඉන්ටනෙට් යන ආකාරයත්, ස්කයිප් මගින් කතාකරන ආකාරයත් ඉමල්කාට කියාදුන් ගාමින්ද හැමදාම හවසට දරුදෙදෙනා සමඟ කතා කරන ලෙස ඇයට උපදෙස් දුන්නා.

ඒ ආකාරයට ඉමල්කා සමඟ ගනුදෙනු කළහැකි, කතා කළ හැකි සියලූ පහසුකම් සම්පාදනය කළා. ගාමින්ද විරහ ගින්දරත් තුරුලූ කරගෙනම ගුවන්ගත වුණා. පුංචි දරුදෙදෙනා තුරුලූකරගත් ඉමල්කා ඔහුට සෙත් පැතූමුත් හදවතින් දස දහස්වතාවක් හඬාවැටුනා.

විවාහවීමෙන් පසු ගාමින්දගෙන් වෙන්ව සිටි පළමු දිනය ගෙවාදැමීමත් ඉමල්කාට දුෂ්කර කටයුත්තක් වුණා.

පරිගණකය ක‍්‍රියාත්මක කර ඉමල්කා ගාමින්ද කතාකරන තුරු බලාසිටියා. ගාමින්දත් එරටට පයතැබූ විගසම සිදුකළේ ඉමල්කාට කතාකිරීම. ඒ වෙද්දි පුංචි පැටව් දෙන්නා සුව නින්දේ පසුවුණා. ඉමල්කත් ගාමින්දත් ඒ වෙන්වීමේ හුදකලාබව හා ගුවන්ගමනේ ආ ගිය තොරතුරු පිළිබඳව බොහෝවෙලා කතාකළා.

ඒ ආකාරයට ඉමල්කත් ගාමින්දත් ඔවුන්ගේ පෞද්ගලික තොරතුරු කතාකිරීම හැමදාම සිදුකළා. අඹුසැමියන් වූමින් ඔවුන් අතර කිසිදු රහසක් තිබුණේ නෑ.

දවසක් ඉමල්කා එසේ කතාකර සිටින අතරතුරකදී හදිසි විදුලි ඇණහිටීමක් සිදුවුණා. යළිත් විදුලිය ආවත් පරිගණකය නම් වැඩකළේ නැහැ.

ඉමල්කා ගාමින්දට කතාකර ගත නොහැකිව මානසිකව ලෙඩවුණා. ඒ නිසයි පරිගණකය හදාගැනීමට අසල නිවසක සිටි ගාමිණි අයියාට කතාකළේ. ඔහු ගාමින්ද සිටි කාලයේ සිටම පවුලේ හිතවතෙක් වුණා.

ගාමිණි අයියාත් ඉමල්කාගේ ආරාධනය පිළිගෙන ඇගේ නිවසට පැමිණියා. පරිගණකය පරීක්ෂාකර එය නැවත සක‍්‍රීයකර දුන්නා. ඉමල්කාටත් ගොඩක් සතුටුයි. ඇය ගාමිණි අයියාට මුව නොසෑහෙන ලෙස ස්තූති කළා.

එය සුළුදෙයක් කියූ ගාමිණි අයියා නිහඬවම නිවසින් පිටවී මඟට බැස්සා.

ඉමල්කාට පරිගණකය සක‍්‍රීයවීම මහමෙරක් වගේ. ඇය යළිත් හැමදිනකම ගාමින්දත් සමඟ දොඩමළුවුණා. පුංචි පැටව් දෙන්නත්, තාත්තත් සමඟ ආදරයෙන් කතාකළා. ඒ ආදරය එසේ ගලාගෙන ගියා වගේම ගාමින්ද හම්බකරන හැම සතපහක්ම ඉමල්කාට එවීමටත් අමතක කළේ නැහැ. සිය ආදරණීය සැමියා එවන මුදල් නිශ්කාරණේ වියදම් නොකිරීමට ඉමල්කා වගබලා ගත්තා. ඒ සියළු මූල්‍යමය කටයුතු ගැනත් ඔවුන් ස්කයිප් එකෙන් කතාකළා.

දවසක් ඉමල්කාට අමුතු දුරකථන ඇමතුමක් ආවා. ඇයගේ නිරුවත් වීඩියෝ පට මේ නිර්නාමික පුද්ගලයා ලඟ තිබෙන බවත් ඒවා ලබාගැනීමට නම් ඔහුට ලක්ෂගානක මුදල් අවශ්‍ය බවත් ඔහු පැවසුවා.

ඉමල්කා හොඳටම බයවුණා. ඇය සැබෑවටම ආදරය කළේ ගාමින්දට විතරයි. ඇගේ ලෝකයේ සිටියේ ඔහුත් පුංචි පැටවුන් දෙදෙනාත් විතරයි. ඇයගේ බලාපොරොත්තුව වූයේ ගාමින්ද පැමිණෙන තුරු දරුවන් දෙදෙනා බලාගෙන චරිතවත් ජීවිතයක් ගතකිරීම. එහෙත් මේ සිදුවූයේ කුමක්ද? ඇය දස අතේ කල්පනා කළා.

ඒත් ඇයට කිසිවක් සිතාගත නොහැකිවුණා. ළමා කාලයේ ආර්ථිකයෙන් බැටකෑ ඇය විවාහයෙන් පසුව හිනාවී ජීවත්වුණා. ඒත් ඒ හිනාවත් උදුරගන්න තවත් නරුමයෙක් බිහිවෙලා.

ඇය තර්ජනය කරන පුද්ගලයාට මුදල් නොමැති බව පැවසුවා. ඒත් ඔහු ඇගේ නමට එවන සියලූම මුදල්වල තොරතුරු දන්න බව පැවසුවා. ගාමින්ද ඇයට කියන සියලූම දේ ඔහුත් ඇයට කියනවා. ඇය තවතවත් කලබල වුණා. මුදල් දීම කෙසේ වෙතත් ඇගේ නිරුවත් වීඩියෝ ඔහුට කොහෙන්ද? ඇය කල්පනා කළා. මේ සිදුවීම ගාමින්ද දැනගත්තොත් මොනව හිතාවිද ඇය කල්පනා කළා.

ඒ නිසයි ඇය ඇගේ හොඳම යෙහෙළිය වූ සුසීමා මුණ ගැසුණේ. සුසීමා ඉමල්කාගේ කතාව අහගෙන හිටියා. ඒ අනුව ඇයට පරිගණක හදිසි ප‍්‍රතිචාර සංසදයට යන්න ඇයව යොමුකළා.

එහි පිහිට පතා ගිය ඇය සැබැවින්ම විස්මයට පත්වුණා. ඒ සිදුව ඇති දේ විශ්වාස කරගත නොහැකි වූ නිසා ඇයගේ පරිගණකය ලෙඩදුන් වෙලාවේ එය සැදීමට භාරදුන් ගාමිණි අයියා පිළිබඳ ඇය මොහොතකටවත් සැකකළේ නෑ.

ඒත් ඔහු උපක‍්‍රමශීලී වෙලා. යම්කිසි ක‍්‍රමයකට ඇගේ පරිගණකයේ පාලනය ඔහුගේ අතට අරගෙන. එනම් ඇය ස්කයිප් යන හැම මොහොතකම, ඇය කරන්නේ කුමක්ද කියන්නේ කුමක්ද කියා ඔහු බලා ඉඳලා. ඒ අනුව ඇය සැමියා හා කතාකරන විට ඇය සිටි ආකාරයට වීඩියෝ කරලා ඇය සැමියත් සමඟ මුදල් ගනුදෙනු පිළිබඳ කතා කළ සියළු දේ අහගෙන ඉඳලා සියළු තොරතුරු එකතු කරගෙන ඇය බියවද්දා මුදල් ලබාගැනීමට කටයුතු කරලා.

මෙම සිදුවීමෙන් ඔබට සිතීමට බොහෝ දේ තිබෙනවා. පරිගණක විධි පිළිබඳ දැනුම වර්ධනය

කරගැනීම අද කාලීන අවශ්‍යතාවක්. ඒ නිසාම ඔබ වෙනුවෙන් පරිගණක හදිසි ප‍්‍රතිචාර සංසදයේ ජ්‍යෙෂ්ඨ පරිගණක ඉංජිනේරු රොෂාන් චන්ද්‍රගුප්ත මහතා මෙසේ අදහස් දැක්වූවා.

හැම අවස්ථාවකම ඔබගේ පරිගණකයේ නීත්‍යානුකූල මෙහෙයුම් පද්ධතියක් (Operating system) ස්ථාපනය කරන්න.

මෙහෙයුම් පද්ධතිය නිරන්තරයෙන් යාවත්කාලීන (Update) කරන්න.

නීත්‍යානුකූල ප‍්‍රතිවයිරස (Antivirus) මෘදුකාංගයක් භාවිත කරන්න.

එම ප‍්‍රතිවයිරස මෘදුකාංගයද නිරන්තරයෙන් යාවත්කාලීන කරන්න.

ඔබ අන්තර්ජාලය නිරතුරුව භාවිත කරන්නෙක් නම් අන්තර්ජාල සුරැකුම් (internet Security) මෘදුකාංගයක් ස්ථාපනය කරගන්න. නැතහොත් අන්තර්ජාල ආරක්ෂාව සහිත ප‍්‍රතිවයිරස මෘදුකාංග පැකේජයක් Antivirus Software Pakage) භාවිත කරන්න.

තමන්ගේ එදිනෙදා කටයුතුවලට අත්‍යවශ්‍ය මෘදුකාංග පමණක් ස්ථාපනය කරගන්න.

සැමවිටකම නීත්‍යානුකූල (Non pirated) යෙදවුම් මෘදුකාංග (Application Software) භාවිත කරන්න.

සැකකටයුතු හෝ අන්තර්ජාලයේ නොමිලේ ලබාදෙන මෘදුකාංග (Software) නිසි පරීක්ෂාවකින් තොරව ස්ථාපනය කිරීමෙන් වළකින්න.

අන් අයෙකු සතු CD, DVD හෝ Pen drive ඔබගේ පරිගණකයට ඇතුළත් කරන්නේනම් ඒවා විවෘත (Open) කිරීමට පෙර ප‍්‍රතිවයිරස මෘදුකාංගයෙන් පරීක්ෂා කිරීමෙන් (Scan from antivirus) පසුව පමණක් විවෘත (Open) කරන්න.

ඔබ අන්තර්ජාලයේ සැරිසරන විට ඔබගේ අනුදැනුමකින් තොරව ඔබවෙත පැමිණෙන දැන්වීම්, වෙබ් පිටු සහ වෙනත් කරදරකාරී පණිවුඩ (Pop ups) කිසිවකට ප‍්‍රතිචාර දැක්වීමෙන් වළකින්න. ඒවා ඔබගේ Internet Security tool එකෙන් හැකිනම් අවහිර (block) කරන්න.

සැමවිටම පරිගණකය භාවිත කිරීම සඳහා සාමාන්‍ය ගිණුමක් (General User Account) භාවිත කරන්න. මෘදුකාංග (Software) ස්ථාපනය කිරීමට පමණක් පාලක (Administrator) ගිණුම භාවිත කරන්න.

ඔබගේ පරිගණකය තවත් අයෙක් සමග හවුලේ භාවිත කරන්නේනම් එම පුද්ගලයාටද සාමාන්‍ය ගිණුමක් (General User Account) සාදා දෙන්න. එමගින් ඔබගේ තොරතුරු එම පුද්ගලයා සමග හුවමාරු වීමෙන් වැළකේ. කීපදෙනෙක් භාවිතා කරන්නේනම් සියලූ දෙනාට සාමාන්‍ය ගිණුම් පමණක් යොදාගන්න.

ඔබ පරිගණකය කිසියම් නඩත්තු/අලූත්වැඩියා (Upgrade/Repair) කටයුත්තක් සඳහා පරිගණක අලෙවිසලකට භාර දෙනවිට විශ්වාසවන්ත ස්ථානයකට භාරදෙන්න.

ඔබගේ පරිගණකය තාවකාලිකව වෙනත් අයෙකුට භාවිතය සඳහා ලබාදෙන්නේ නම් එහි ඇති සියලූ රහසිගත තොරතුරු නැවත ලබාගත නොහැකි ලෙස මකා දමා හෝ ආරක්ෂිත උපක‍්‍රම භාවිතකර ඒවා සඟවා භාවිතය සඳහා

ලබාදෙන්න.